ᤘᤧᤃᤣ᤺ᤰᤔᤠ ᤗᤠ ᤛᤡᤃᤠᤱᤒᤠ
ᤋᤢᤶᤂᤠ᤺ᤵᤔᤡᤀᤡᤸᤗᤧ ᤆᤡᤍᤧᤵ ᤋᤧᤵᤋᤢᤒᤠ
ᤐᤃᤢᤃᤧᤴ ᤐᤠᤱᤓᤣ᤹ ᤗᤢᤶᤔᤥ
ᤏᤡᤱᤂᤠᤶᤗᤧ ᤂᤠᤵᤋᤢᤀᤠᤱ ᤁᤧᤒᤵᤐᤠ
ᤗᤠᤣ᤺ᤰᤑᤠᤃᤧᤴ ᤛᤡᤱᤄᤡᤶᤔᤡᤴ ᤑᤩᤠᤰ ᤗᤛᤢᤖ
ᤐᤃᤢᤃᤧᤴ ᤐᤠᤱᤓᤣ᤹ᤀᤡᤴ ᤋᤡᤸᤗᤠᤣ᤺ᤰ ᤗᤠᤣ᤺ᤰᤂᤢᤖ
ᤋᤢᤶᤂᤠ᤺ᤵᤔᤡᤀᤡᤴ ᤜᤳᤇᤧ ᤛᤧ᤺ᤛᤢᤖ
ᤁᤧᤖ᤺ᤶᤒᤠ ᤀᤡᤰᤗᤠᤀᤡᤴ ᤂᤠᤛᤠᤱ
ᤜᤠ᤺ᤳᤗᤧᤴᤏᤠᤱ ᤔᤧ᤺ᤴ
ᤁᤖ ᤏᤧᤴᤏᤧ᤹ᤖᤧᤴ ॥
.
ᤂᤧᤴ ᤀᤡᤰᤗᤠᤀᤥ
ᤔᤡᤰᤗᤠ ᤏᤢ ᤑᤧᤴᤈᤣ ᤁᤠᤣ᤺ᤶᤗᤧᤴ
ᤀᤡᤰᤗᤠ ᤕᤠᤰ
ᤋᤢᤱᤔᤢᤰ ᤏᤢ ᤛᤡᤱᤓᤧᤰᤘᤠᤖᤧᤴ
ᤛᤠᤶᤀᤡᤰ ᤕᤠᤰ
ᤜᤱᤛᤡᤱ ᤁᤣ ᤏᤢ ᤏᤧᤃᤪᤠᤖᤧᤴ
ᤆᤡᤶᤕᤱᤘᤠ ᤕᤠᤰ
ᤔᤢᤴᤎᤢᤶ, ᤐᤠ᤺ᤸᤗᤠᤶ ᤏᤢ ᤜᤠᤰᤐᤠᤖᤣᤖᤧᤴ
ᤀᤡᤰᤁᤢᤶᤘᤠ ᤏᤢ ᤀᤡᤰᤋᤡ᤺ᤰ ᤕᤠᤰ
ᤂᤩᤠ᤺ᤗᤡᤖᤧᤴ ᤛᤠᤶᤍᤡ᤺ᤰ ᤕᤠᤰ ॥
.
ᤂᤧᤴ ᤀᤡᤰᤗᤠᤀᤡᤴ
ᤜᤏᤧᤒᤠ ᤀᤡᤰᤗᤠ ᤜᤠᤣ᤺ᤵ
ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧᤴ ᤌᤰ
ᤁᤧᤖ᤺ᤥᤱᤒᤠ ᤔᤠᤱᤛᤢᤳᤗᤠ ᤕᤠᤰ
ᤀᤡᤰᤛᤠᤃᤧᤴ ᤂᤠᤶᤒᤣ᤺ᤰᤔᤧᤴ ᤁᤧᤔᤢᤴᤒᤠ
ᤔᤢᤴᤍᤠᤱᤃᤧᤴ ᤛᤣᤖᤡᤖᤧᤴ ᤌᤢᤶ ᤕᤠᤰ
ᤋᤖᤱᤍᤡᤱ ᤋᤠᤱᤛᤠᤱ ᤁᤧᤕᤠ᤺ᤶᤒᤠ
ᤔᤢᤖᤢᤵᤗᤡᤖᤧᤴ ᤁᤢᤔᤢᤰ ᤕᤠᤰ ॥
ᤀᤧᤴ ᤀᤡᤰᤛᤠᤃᤧᤴ ᤂᤠᤶᤒᤣ᤺ᤰᤔᤠ
ᤛᤠᤣ᤺ᤖᤧ ᤆᤢᤖᤧᤒᤠ ᤋᤧᤴᤀᤥ
ᤛ᤺ᤱᤈᤢᤶ-ᤀᤡᤱᤈᤢᤶ ᤛᤠᤣ᤺ᤖᤧ ᤆᤢᤖᤧᤒᤠ ᤘᤠᤏᤠᤶᤀᤥ
ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤔᤧᤒᤥᤃᤧ
ᤔᤧᤈᤢᤖᤧᤒᤠ ᤂᤠᤶᤒᤣ᤺ᤰᤁᤥ
ᤀᤠᤸᤗᤥᤛᤠᤱ ᤏᤧᤴᤏᤧ᤹ᤖᤧ
ᤁᤢᤗᤢᤱᤔᤠ᤹ᤀᤡᤴ ᤌᤣ᤺ᤸᤗᤧᤀᤡ
ᤆᤡᤵᤐᤢᤳ ᤐᤢᤳᤋᤢ ᤐᤡᤖᤢᤒᤠ ᤜᤧᤰᤁᤣ
ᤁᤢᤅᤡ᤺ᤱᤅᤡᤴ ᤜᤠ᤺ᤳᤗᤧᤀᤡ
ᤆᤡᤕ᤹ ᤕ᤹ᤖᤢ ᤐᤡᤖᤢᤒᤠ ᤜᤧᤰᤁᤣ
ᤑᤡ᤺ᤰᤗ ᤀᤢ᤺ᤒᤠ ᤀᤡᤰᤗᤠᤀᤡᤸᤗᤧ
ᤀᤠᤱᤃᤠ᤹ᤀᤠᤱ
ᤀᤠᤗᤢᤱᤔᤠ᤹ᤀᤡᤴ ᤗᤠᤣ᤺ᤰᤂᤢ ᤐᤡ᤹ᤕᤠ
ᤀᤠᤗᤢᤱᤔᤠ᤹ᤀᤡᤴ ᤕᤰᤂᤢ ᤐᤡ᤹ᤕᤠ ॥
.
ᤋᤠᤵᤌᤢᤱᤔᤥᤖᤳ ᤔᤧ᤺ᤴᤏᤠᤱ ᤛᤧᤵᤔᤠᤱᤔᤥᤀᤠᤱ
ᤋᤠᤍᤠᤶᤒᤠ ᤗᤠᤣ᤺ᤀᤠᤱ ᤜᤠ᤺ᤵᤗ
ᤀᤰᤁᤣᤖᤡᤰ ᤑᤡ᤺ᤰᤐᤠ ᤏᤢ ᤀᤢ᤺ᤒᤠ ᤂᤧᤵᤛᤢᤱ
‘ᤀᤠᤴᤇᤡ᤹ ᤗᤳᤇᤠ ᤐᤠ ᤏᤢ ᤔᤠᤖᤧᤴ ᤛᤠ
ᤗᤳᤇᤠ ᤛ᤺ᤱᤈᤢᤶ-ᤀᤡᤱᤈᤢᤶᤒᤠ ᤔᤏᤠ
ᤁᤖ
ᤀᤠᤱᤃᤠ᤹ ᤌᤣᤀᤠᤱ ᤘᤠ᤺ᤳᤋᤡᤖᤧᤴ
ᤁᤰ ᤁᤢ᤺ᤔᤠ ᤘᤠ᤹ ᤁᤵᤔᤥ
ᤗᤢᤱᤍᤠ᤹ ᤏᤢ ᤛᤢᤶᤍᤠᤱᤗᤧᤴ
ᤋᤧᤳ ᤂᤠᤣ᤺ᤔᤠ ᤘᤠ᤹ ᤁᤵᤔᤥ
ᤁᤴ ᤘᤠ᤺ᤳᤋᤡᤜᤠ᤹ᤖᤧ ᤜᤶᤔᤠᤒᤧᤴ
ᤗᤠᤱᤒᤠ᤺ᤱᤃᤡᤖᤧ ᤀᤠᤗᤠᤱ ᤂᤣ᤺ᤰᤂᤢᤒᤧᤴ
ᤜᤢᤰᤐᤠ᤺ᤱᤃᤡᤖᤧ ᤀᤠᤜᤢᤰ ᤋᤧᤶᤛᤢᤒᤧᤴ
ᤜᤠ᤺ᤳᤋᤡᤸᤗᤧ ᤏᤡ᤺ᤔᤠ ᤛᤢᤰᤋᤢ᤹ ᤁᤵᤔᤥ
ᤗᤢᤱᤍᤠ᤹ ᤏᤢ ᤛᤢᤶᤍᤠᤱᤗᤧ ᤀᤠᤎᤰ ᤁᤧᤵᤋᤢᤒᤧᤴ
ᤜᤠ᤺ᤳᤋᤡᤸᤗᤧ ᤀᤡ᤺ᤳᤋᤢᤀᤠᤱ ᤁᤵᤔᤥ
ᤕᤠᤱᤍᤠᤱ ᤂᤠ᤹ᤏᤠᤶᤗᤧ ᤀᤠᤏᤢᤶᤒᤪᤠᤣ᤺ᤵᤐᤠ ᤕᤠ᤹ᤖᤢᤒᤧᤴ
ᤜᤠ᤺ᤳᤋᤡᤸᤗᤧ ᤛᤠᤣ᤺ᤵᤛᤢᤀᤠᤱ ᤁᤵᤔᤥ
ᤛᤡ᤺ᤰᤑᤀᤡᤖᤧ ᤀᤠᤂᤧᤏᤠᤒᤧᤴ ᤕᤠ᤹ᤖᤢᤒᤧᤴ
ᤜᤠ᤺ᤳᤋᤡᤸᤗᤧ ᤀᤡ᤺ᤳᤏᤡ᤺ᤶ ᤆᤥᤃᤢᤀᤠᤱ ᤁᤵᤔᤥ ॥’
.
ᤏᤧᤴᤏᤧ᤹ ᤛᤠᤶᤗᤥᤛᤠᤱ
ᤁᤢᤀᤡᤰᤗᤠᤖᤧᤴ ᤀᤡᤰᤁᤢᤶᤘᤠᤀᤥ-
‘ᤛᤱᤘᤠᤒᤠᤜᤠ᤹ ᤋᤧᤕᤡᤴᤏᤧ᤹
ᤐᤌᤠᤱ ᤏᤢ ᤛᤰᤗᤡᤵ (ᤋᤵᤐᤪᤡ) ᤗᤧᤰᤋᤢᤶ
ᤛᤡᤶ ᤏᤢ ᤛᤢ᤺ᤶᤒᤠ ᤗᤧᤰᤋᤢᤶ
ᤘᤠ᤺ᤵᤑᤣ᤹ ᤏᤢ ᤑᤡᤈᤠ ᤗᤧᤰᤋᤢᤶ
ᤕᤠᤱᤍᤠᤱ ᤏᤢ ᤜᤱᤛᤡᤱ ᤁᤣᤀᤡᤴ ᤗᤧᤰᤋᤢᤶ
ᤀᤠᤅᤡ᤺ᤱ, ᤀᤠᤏᤧᤓᤠᤰ ᤏᤢ ᤀᤠᤏᤧᤒᤥ᤹ᤜᤠ᤹ᤖᤧ
ᤁᤧᤖᤡ᤺ᤵᤐᤠ ᤁᤰᤜᤠ᤹ ᤋ᤺ᤥᤰᤔᤠ ᤔᤧᤴᤛᤢᤰᤋᤢᤴ
ᤁᤧᤖᤡ᤺ᤵᤐᤠ ᤋᤧᤳᤜᤠ᤹ ᤁᤢ᤺ᤔᤠ ᤔᤧᤴᤛᤢᤰᤋᤢᤴ
ᤋᤣ᤹ᤖᤠᤶᤔᤧ᤹ᤀᤠᤱ ᤕᤵᤰᤁᤧᤴᤜᤡᤶᤀᤥ
ᤂᤧᤏᤡ᤺ᤴ ᤛᤠᤵᤔᤢᤴᤎᤢᤶ ᤐᤠᤣ᤺ᤱᤗ ᤆᤡᤰᤂᤠᤶᤔᤧ᤹
ᤂᤧᤏᤡ᤺ᤴ ᤛᤠᤰᤌᤡᤶ ᤕᤠ᤺ᤰᤗ ᤕᤢᤰᤂᤠᤶᤔᤧ᤹’
ᤜᤠ᤺ᤵᤗ ᤑᤵᤰᤐᤠ ᤂᤧᤵᤛᤢᤱ
ᤛᤧᤵᤔᤠᤱ ᤏᤢ ᤋᤠᤵᤌᤢᤱᤀᤥ ᤏᤧᤴᤏᤧ᤹ᤖᤧ ᤁᤢᤀᤡᤰᤗᤠ᤺ᤴ ॥
.
ᤀᤰᤗᤧᤱ :
ᤏᤧᤴᤏᤧ᤹ᤖᤧᤴ ᤁᤢᤀᤡ᤺ᤰᤗᤠᤜᤠ᤹ ᤛᤠᤶᤔᤡᤗᤠ ᤛᤢᤱ
᥈᥆᥈᥆
यदि तपाईंसँग कुनै लेखरचना वा मूलधारका मिडियाबाट किनारीकृत मुद्दा तथा विषयहरू छन् भने हामीलाई [email protected] मा पठाउनुहोस् ।
