खाद्य समस्या सम्बोधनका लागि काम गर्न नेता किमको निर्देशन

एजेन्सी- उत्तर कोरियाका नेता किम जोङ–उनले जलवायु परिवर्तनका कारण उत्पन्न खाद्य जोखिमको समाधानका लागि काम गर्न उत्तर कोरियाली अधिकारीहरूलाई निर्देशन दिएका छन् । जलवायु परिवर्तनका कारण उत्पन्न जोखिमलाई चर्चा गर्दै खाद्य सुरक्षाको पाटोलाई विशेष ध्यान दिनुपर्ने उनले बताएका हुन् ।

गएको वर्ष तुफानले उत्तर कोरियाको मुख्य खाद्यान्न बालीमा गम्भीर असर गरेको थियो भने यो वर्ष पनि केही हप्तासम्मको खडेरीपछि लामो मनसुन वर्षाका कारण बालीमा असर गरेको छ । खडेरी तथा बाढीसहितका असामान्य मौसमी गतिविधिसँग जुध्नका लागि अबको प्रयास केन्द्रित हुनु पर्ने धारणा नेता किमले पार्टीको पोलिटब्यूरो बैठकमा राखेका हुन्।

पछिल्ला वर्षहरुमा उत्तर कोरियामा पनि जलवायु परिवर्तनको असर गम्भीर रुपमा देखिन थालेको भन्दै उनले त्यससँग जुध्नका लागि तत्काल आन्तरिक प्रयास थालिनु पर्ने बताएका छन् ।