कश्मीरः पृथकतावादी नेता गिलानीको निधन

काठमाडाैँ - कश्मीरका पृथकतावादी नेता सैयद अली शाह गिलानीको निधन भएको छ । ९२  वर्षीय गिलानी अल पार्टी हुर्रियत कन्फरेन्सका अध्यक्ष थिए ।

उनको निधनमा कश्मीरको सुरक्षा व्यवस्था कडा पारिएको छ भने त्यहाँ इन्टरनेट सेवा बन्द गरिएको छ । त्यहाँ कर्फ्युसमेत लाग्न सक्ने जानकारी दिएको भारतीय सञ्चार माध्यमहरुले खबर लेखेका छन् । । पाकिस्तानका प्रधानमन्त्री इमरान खानले गिलानीको निधनप्रति दुस्ख व्यक्त गर्दै एक दिनका लागि  शोक र झण्डा आधा झुकाउने घोषणा गरेका छन् । 

को हुन् गिलानी ?

गिलानी कश्मिरमा सक्रिय पृथकतावादी नेता हुन् । २९ सेप्टेम्बर १९२९ मा जन्मिएका उनी हुर्रियत कन्फरेन्सका उदारवादी नेता मानिन्छन् ।

उनी कश्मीरको सोपोर विधानसभामा तीनपटक विधायकको भूमिकामा निर्वाचित भएका थिए ।

तीन दशकभन्दा लामो समयदेखि कश्मीरलाई भारतबाट अलग राख्नु पर्ने अडान राख्दै अभियान चलाएका गिलानी १५ वर्षसम्म पूर्व जम्मु कश्मीर राज्यको ८७ सदस्य रहेको विधान सभाका सदस्य रहेका थिए । सन् १९८९ मा सशस्त्र द्वन्द्व पछि उनीसहित चार जमात नेताले राजीनामा दिएका थिए ।  

उनले प्रतिनिधित्व गर्ने जमात ए इस्लामीमाथि भारतले प्रतिबन्ध लगाएको छ । भारतले गिलानीमाथि पाकिस्तानसँग मिलेर कश्मीरमा पृथकतावादी आन्दोलन भड्काइरहेको आरोप लगाउँदै आएको कारण गिलानीमाथि देशद्रोहको मुद्दा पनि चलाइएको थियो ।

भारत सरकारले सन् १९८१ मा उनको पासपोर्ट पनि जफत गरेको थियो । तर, सन् २००६ मा हज यात्राका लागि भन्दै गिलानीलाई पासपोर्ट दिइएको थियो । गिलानीले कश्मीरलाई भारतको भाग नमानेकै कारण उनीमाथि भारतले दबाब बढाएको उनका समर्थकको भनाइ छ ।