अमेरिका–मेक्सिको सीमामा उभिएको चराको तस्बिर यो वर्षकै उत्कृष्ट

काठमाडाैँ - मेक्सिकोका अल्ज्यान्द्रो प्रिइटो यो वर्षकै उत्कृष्ट बर्ड फोटोग्राफर बनेका छन् । प्रिइटोले खिचेको अमेरिका–मेक्सिको सीमामा उभिएको चराको तस्बिरले उहाँलाई यो वर्षको ‘बर्ड फोटोग्राफर अफ द इयर’को विजेता बनेका हुन् । 

तस्बिरमा सीमामा लगाएका अग्ला पर्खाल र काँडेतारका कारण चरा सडक पारिपट्टि जान नसकेर टुलुटुलु पर्खाल हेरेर उभिरहेकाे देखाइएकाे छ। फोटोग्राफर प्रिइटोले सीमामा खडा गरिएका पर्खालले जैविक विविधतामा खतरा पुगेको कुरा तस्बिरले देखाएको बताएका छन् ।

प्रिइटोका अनुसार सीमा पर्खालले पूरै मरुभूमि र पहाडलाई नाघेको छ र १५ सय बढी जनावर र बिरुवाको जैविक विविधतामा बाधक बनेको छ । उनले धेरै जनावर तथा चराहरु पर्खालसम्म पुगेको र पारिपट्टि जान नसकेर फर्केको देखेको पनि बताएका छन् ।

प्रतियोगितामा सहभागी २२ हजार तस्बिरमध्ये प्रिइटोको तस्बिर वर्ष २०२१ को उत्कृष्ट भएको बीबीसीले जनाएको छ । पुरस्कारको राशि पाँच हजार पाउण्ड स्टर्लिङ रहेको छ । फोटोग्राफर अल्ज्यान्द्रो प्रिइटो सीमा क्षेत्रमा वन्यजन्तुबारे डकुमेन्ट्री गर्दै आएका छन् ।

सीमानाकाका पर्खालले जनावर तथा धेरै उड्न नसक्ने चराहरुलाई बसाइँसराइ गर्नमा समस्या देखिने गरेको छ । यसले गर्दा प्रजनन तथा आनुवंशिक निरन्तरतामा बाधा पुग्ने बताइएको छ । यस विषयमा अन्तर्राष्ट्रिय स्तरमा बहस पनि हुँदै आएको छ ।