छानबिन समितिकाे निष्कर्ष : दार्चुला घटनामा एसएसबीको उपस्थिति छ

काठमाडौँ- दार्चुलाका जयसिंह धामी तुइनबाट खसेर बेपत्ता भएको घटनाबारे छानबिन गर्न गठित समितिले भारतीय सीमा सुरक्षा बल (एसएसबी) को उपस्थितिमा घटना भएको निष्कर्ष निकालेको छ । गृह मन्त्रालयका सहसचिव जनार्दन गौतम संयोजकत्वको छानबिन समितिले ब्याँस गाउँपालिका- २ का जयसिंह धामी महाकाली नदीमा खसेको घटना भारतीय सुरक्षाकर्मी एसएसबीको उपस्थितिमा भएको निष्कर्ष निकालेको हो ।

गौतमले गृहमन्त्री बालकृष्ण खाँणलाई आज साँझ एक महिना लगाएर तयार पारिएको प्रतिवेदन बुझाएका थिए ।छानबिन समितिले एसएसबीको संलग्नतामा पुन: अनुसन्धान गर्न र दोषीलाई कारबाही गर्न सिफारिस गरेको गृह मन्त्रालयले जनाएको छ ।

‘समितिले उक्त घटना भारतीय एसएसबीका सुरक्षाकर्मीको उपस्थितिमा घटेको देखिएकोले निजहरुको संलग्नता सम्बन्धमा अनुसन्धान गरी दोषी उपर कानुनी कारवाही गर्न र जयसिंह धामीका परिवारलाई उचित क्षतिपूर्ति र राहत उपलब्ध गराउन भारतीय पक्षसँग कुटनीतिक माध्यमबाट पहल गर्न साथै आश्रित परिवारलाई नेपाल सरकारका तर्फबाट पालन पोषण र शिक्षादीक्षाको व्यवस्थापन गर्न सिफारिस गरेको छ’ , जारी गरेको विज्ञप्तिमा भनिएको छ ।

गत साउन १५ गते दार्चुलाको व्यास गाउँपालिकाका धामी तुइनबाट खसेर बेपत्ता भएका थिए । घटनाको अनुसन्धानका लागि सरकारले साउन १७ गते १० दिनमा प्रतिवेदन बुझाउन भन्दै गृह मन्त्रालयका सहसचिव गौतमको संयोजकत्वमा छानबिन समिति गठन गरेको थियो ।

समिति पीडितका परिवार, धामीसँग तुइन तरेका प्रत्यक्षदर्शीलगायतसँग टोलीले बयान समेत लिएको थियो ।

हेर्नुहोस् विज्ञप्ति