अफगानिस्तानः अमेरिकाले आईएस विरुद्धको आक्रमणलाई निरन्तरता दिने

काठमाडाैँ - अमेरिकाले अफगानिस्तानकाे काबुल विमानस्थलमा भएको आक्रमण पछि त्यहाँ रहेका इस्लामिक स्टेट आईएस विरुद्धको आक्रमणलाई निरन्तरता दिने बताएको छ । 

अमेरिकाको राष्ट्रिय सुरक्षा सल्लाहकार जेक सुलिवनले आईएसलाई परास्त गर्न दोस्रो अभियान सुरु गर्ने पनि बताएका छन् । काबुल विमानस्थलमा हिजो फेरि विस्फोट भएको थियो ।  

काबुल विमानस्थलमा आक्रमणका लागि लगिँदै गरिएको विस्फोटक सामग्री नष्ट गर्न र आत्मरक्षाका लागि आक्रमण गरेको अमेरिकाले पुष्टि गरेको छ । यसले आईएसबाट हुने सम्भावित आक्रमण टरेको पनि अमेरिकाले जनाएको  छ । अमेरिकाले आईएस विरुद्ध गरेको यो दोस्रो आक्रमण हो ।

केही दिन अघि काबुल विमानस्थलमा १३ जना अमेरिकी सैनिकसहित १७० जनाको ज्यान जाने गरी आक्रमण भएको थियाे । अमेरिकी राष्ट्रपति जो बाइडेनले काबुल विमानस्थलमा आक्रमण गर्नेलाई कुनै पनि हालतमा नछोड्ने बताएका छन् ।