काबुलमा अर्को आतंककारी हमला हुनसक्ने सम्भावनाः बाइडन

काठमाडाैँ - अमेरिकी राष्ट्रपति जो बाइडनले अफगानिस्तानको काबुलमा अर्को आतंककारी हमला हुनसक्ने सूचना रहेको बताएका छन् ।

बाइडनले त्यहाँको अवस्था एकदमै खत्तरापूर्ण रहेको र विमानस्थलमा अर्को आतंककारी हमला हुनसक्ने सम्भावना धेरै रहेको जानकारी सैन्य कमाण्डरले दिएको उल्लेख गरेका छन् ।

बिहीबार काबुल विमानस्थल नजिक भएको आक्रमणमा १६९ अफगान नागरिक र १३ अमेरिकी नागरिकको मृत्यु भएको थियो । त्यसको बदलामा अमेरिकाले शनिबार ड्रोन आक्रमण गरेको थियो । उक्त आक्रमणमा विस्फोटका योजनाकार मारिएको अमेरिकी सेनाको दाबी छ ।

गत बिहीबार भएको आक्रमणअघि पनि अमेरिका र बेलायतले विमानस्थलमा आक्रमण हुने सूचना आएको भन्दै सचेत गराएका थिए । त्यसको भोलिपल्ट आत्मघाती विस्फोट भएको थियो ।