काबुल विमानस्थलबाहिर विस्फोट : १३ बालबालिकाको मृत्यु, ५२ जना  घाइते

एजेन्सी- अमेरिकी नेतृत्वको सेनाले विमानमार्फत् अझै हजारौँको उद्धार बाँकी रहेको बताइरहँदा अफगानिस्तानको काबुल विमानस्थलबाहिर भएको विस्फोटमा परी मृत्यु हुनेको संख्या १३ पुगेको छ । तालिबानका प्रवक्तालाई उद्धृत गर्दै अलजजिराले १३ जनाको मृत्यु भएको जनाएको हो । 

विस्फोटमा तालिबानका लडाकुहरू सहित ५२ जना घाइते भएका तालिबानका प्रवक्ता जाबीहल्लाह मुजाहिदले बताएको अलजजिराले लेखेको छ । विमानस्थलबाहिर दुईवटा विस्फोट भएको बताइएको छ । 

अफगानिस्तानको काबुल विमानस्थलबाहिर ठूलो विस्फोट भएको अमेरिकी सेनाले यसअघि नै पुष्टि गरिसकेको थियो । अमेरिकी नेतृत्वको पश्चिमी सेनाले विमानस्थल परिसरमा पुगेका हजारौँ मानिसको दैनिक उद्धार गरिरहेका समय विमानस्थल छोड्न तालिवान समूहले चेतावनी दिएको बताइएको छ ।

विमानस्थलमा एशियाली मुलुकका नागरिकहरू पनि उद्धारको पर्खाइमा रहेका हुनसक्ने अनुमान गरिएको छ । पेन्टागनका प्रवक्ता जोन कर्बीले भने, “काबुल विमानस्थल बाहिर ठूलो विस्फोट भएको छ । यतिबेला विष्फोटबाट भएको हताहतबारे स्पष्ट जानकारी प्राप्त भएको छैन । थप विवरण प्राप्त हुँनासाथ दिइनेछ ।”

आत्मघाती बम आक्रमणकारीहरुले विमानस्थलमा आक्रमण गर्ने धम्की दिँदै आएको अमेरिकी र सम्बद्ध अधिकारीहरूले गोप्य सूचना पाएको बताएका छन् । अमेरिकी सेनाले छिट्टै विमानस्थल छोड्ने अफबाह फैलिएपछि यसअघि कर्बीले एक ट्वीटमार्फत् सम्प्रेषित सन्देशमा ‘काबुलमा उद्धार कार्य ३६ घण्टामा पूरा नहुने र मिशनको अन्त्य नभएसम्म हामी सकेसम्म धेरै मानिसहरूलाई उद्धार गरिरहनेछौं’ भनेका थिए ।