एलन मस्कका कारण स्याटेलाइटहरू एकआपसमा ठोक्किने क्रम बढ्यो

एजेन्सी: एलन मस्कको योजनाका कारण स्याटेलाइटहरू एकआपसमा ठोक्किने क्रममा वृद्धि भएको पाइएको छ। मस्कको इन्टरनेट कम्पनी स्पेस एक्सले अन्तरिक्षमा १२ हजार स्टारलिन्क स्याटेलाइट प्रक्षेपण गर्ने योजना बनाएसँगै सो समस्या देखिएको हो । विश्वभर तीव्र गतिको इन्टरनेट पुर्याउनका लागि स्पेस एक्सले स्याटेलाइट प्रक्षेपण गर्न लागेको हो ।

१२ हजार स्टारलिन्क स्याटेलाइटमध्ये १५ सय स्याटेलाइट प्रक्षेपण भइसकेका छन् । यससँगै, अन्तरिक्षमा यति ठूलो संख्यामा स्याटेलाइटले पृथ्वीको परिक्रमा गर्नुको खराब नतिजा के हुनसक्दछ भन्ने सुरुवाती झलक देखा परिसकेको छ ।

एक अध्ययनले अन्तरिक्षमा दुईवटा स्याटेलाइट जन्य वस्तुहरु आमनेसामने हुने वा ठक्कर खाने घटनामध्ये आधाजसोमा स्पेस एक्सका स्याटेलाइट नै संलग्न हुने गरेका उल्लेख गरेको छ । साउथ ह्याम्पटन विश्वविद्यालयको एक अध्ययनअनुसार सयौँ स्टारलिन्क स्याटेलाइटहरू पृथ्वीको कक्षमा छन् । जसले गर्दा अन्य स्याटेलाइट वा अन्तरिक्ष फोहोरका टुक्राहरुसँग ठक्कर खाने आशंका बढ्दछ । शोधकर्ताहरुका अनुसार हरेक हप्ता औसतमा १६ सय यस्ता घटनामा स्टारलिन्कका स्याटेलाइट नै संलग्न हुने गरेका छन् । कतिपय अवस्थामा त यी स्याटेलाइटहरु अन्यसँग, मात्र १ किलोमिटरको दूरीमा आउँछन् ।

स्याटेलाइट अपरेटरहरूले अन्तरिक्षमा रहेका आफ्ना स्याटेलाइटहरु अन्य अन्तरिक्षयान तथा त्यसका टुक्राहरुसँग ठक्कर नखाउन् भनेर लगातार त्यसको निगरानी गरिरहनु पर्दछ । स्पेस डटकमको रिपोर्ट अनुसार दुईवटा अन्तरिक्षयान ठक्कर खाँदा यति धेरै टुक्राटाक्री निस्किन्छन् कि त्यसले आसपासका अन्य स्याटेलाइटलाई पनि खतरा पैदा हुन सक्दछ ।

एस्ट्रोनटिक्स रिसर्च ग्रुपका ह्यू लुइसले यस विषयमा तथ्यांक विश्लेषण गरेका छन् । उनका अनुसार स्टारलिन्क प्रक्षेपणसँगै खतरनाक प्रवृत्ति देखिइरहेको छ । सन् २०१९ को मे’देखि उनले विश्लेषण सुरु गरेकामा घटनाहरु दोब्बरले बढेको पाइएको हो ।

तथ्यांकअनुसार स्टारलिन्क स्याटेलाइट हरेक हप्ता औसतमा ५०० पटक अन्य स्याटेलाइट, यान वा वस्तुको निकै नजिक आउने गरेका छन् । त्यस्तै बेलायतको व्यानवेभका २५० वटा स्याटेलाइट पनि उसैगरी नजिकिने गरेका छन् । स्टारलिन्क स्याटेलाइटको संख्या बढेसँगै यो समस्या गहिरिएको उनको भनाइ छ ।