प्रकाश आङ्देम्बेकाे कविताः पिँजडा

प्रकाश आङ्देम्बे कवि, चलचित्र निर्देशक तथा निर्माता हुन् । 

पिँजडा त पिँजडा हो 
आस्था, विचार होस् या सिसाको 
जहाँबाट संसार देख्न त सकिन्छ, तर मुक्त हुन सकिँदैन ।

उता
पुतली, माहुरी, चराहरू छर्लङ्गको भ्रममा 
सिसाको झ्यालबाट बाहिरिन खोज्दा 
जसरी पटक–पटक ठोक्किएर घाइते हुन्छन् 
र मर्छन्, विडम्बनाको अकाल मृत्यु

यता
आस्था, विचारको झ्यालबाट उसै गरी देखिन्छ भ्रामक स्पष्टता
ठोकिन्छन् मानिसहरू पटक–पटक र ढल्छन्, व्यर्थ मृत्यु

पिँजडा त पिँजडा हो 
आस्था, विचार होस् या सिसाको 
जहाँबाट संसार देख्न त सकिन्छ, तर मुक्त हुन सकिँदैन ।