अभिनेत्री सुरक्षा पन्तको पोस्टले छेडेको बहस

सिनेमामा इन्स्पायर हुने, आइडिया मिल्ने तथा प्रभावित हुने कुरा नौलो होइन । समिक्षक सुवेदीले भनेझैं हामी कहाँ अझै यस विषयमा बहस नै भएको छैन । वास्तविक सर्जकलाई समुचित क्रेडिट दिँदै, अनुमती लिँदै सिनेमा बनाउने हो भने निश्चयलै एक जिम्मेवार फिल्म मेकरले यस्ता चोरीको लफडामा फस्न पर्दैन ।

अभिनेत्री सुरक्षा पन्तको त्यो पोस्ट

आज अभिनेत्री सुरक्षा पन्तले आफ्नो फेसबुक स्टाटसमा लेखेकी छिन्ः

हालसालै मैले काम गर्न पुगेको एउटा छोटो सिनेमा (सर्ट फिल्म) कुनै हिन्दी छोटो सिनेमाको हुबहु कपी रहेको कुरा थाहा पाएपछी मलाई धेरै दुख लागेको छ । पहिले जानकारी भएको भए पक्कै पनि काम गरिदैन थियो होला ।

कुनै आइडिया मन परेर काम गरिन्छ अनि यस्तो गलत हर्कतले गर्दा आफ्नो कामप्रति कहिलेकाहीँ मन खुम्चिन पुग्छ । व्यक्तिगत रुपमा, आइडिया हुबहु कपी गर्ने कुराको घोर बिरोधी हुँ म । त्यसैले अनभिज्ञ भइ यस माहोलको एउटा पात्र हुन पुगेकोमा खेद प्रकट गर्दछु । त्यस्तै यस्तो नक्कल गर्ने प्रवृतिलाई लिएर उनी त्यत्तिकै चिन्तित देखिन्छिन् ।

उनी थप लेख्छिन्ः

तर, फेरी यो नदोहोरिएला भन्न सकिन्न । इन्टरनेटको सम्पुर्ण कन्टेन्ट हेरिसकेको पनि भइदैन । सायद काम गर्नु अघि कलाकार वा अन्य टिमले कन्टेन्ट कपी हो वा होइन भन्ने प्रश्न राख्न कसरी सक्ला, लेखकको सम्मानमा ठेस नपुर्याइ ? सोच्नुपर्ने कुरा हो यो । 

उक्त छोटो सिनेमाको पार्ट २ बनाउने कुरा उठेको र म त्यसमा काम नगर्ने मनशायमा पुगेको छु । यो पाठ हो, केवल मैले होइन सम्पुर्ण टीमले मनन गर्न जरुरी छ । अर्को एउटा महत्वपुर्ण पाठः टिमले राम्रो काम गरेको छ भन्ने कुरा पहिले कलाकारहरुबाट थाहा हुन्छ भने टिमले काम राम्रो नगरेको कुरा पनि कलाकारबाटै थाहा हुने हो । त्यसैले कलाकारहरु एकदम इमान्दार रहन जरुरी छ ।

खासमा नायिका पन्तले 'मनबार' नामक नेपाली छोटो चलचित्रमा भूमिका निर्वाह गरेकी छिन् । उक्त फिल्म हिन्दी फिल्म नामर्दबाट हुबहु चोरी गरिएको आरोप लागेको छ ।  

के छ नेपाली सर्ट फिल्म ‘मन बार’ हिन्दी सर्ट फिल्म ‘नामर्द’मा ?

नेपाली चलचित्र हिन्दी चलचित्रको कथासँग मिलेको खबर त नयाँ होइन । यो प्रवृति हिजो पनि थियो र आजपनि चलिरहेकै छ । अहिले छोटा चलचित्रको ट्रेन्ड बढेर आएको छ तर हिजोका कतिपय फिचर फिल्म जस्तै आजका कतिपय छोटा चलचित्रको कथा पनि हिन्दी छोटा चलचित्रसँग हुबहु मिल्ने गरेका छन् । यसैको पछिल्लो उदाहरण हो 'मनबार' । 

अप्रिल १४ मा युटुबमा रिलिज भएको छोटो चलचित्र ‘मनबार’ अर्को हिन्दी छोटो चलचित्र ‘नामर्द’सँग हुबहु मिल्छ । यतिसम्मकी, नामर्दको संवाद समेत नेपालीमा भाषागत रुपान्तरण गरेर 'मनबार'मा समावेश गरिएको छ । जीवन शाहीको निर्देशनमा बनाइएको ‘मनबार’मा नायिका सुरक्षा पन्त र गायक तथा कलाकार कोशिस क्षेत्रीको मुख्य भूमिका छ ।

नामर्दको एक दृष्य

रुपेन्द्र खड्गीले कथा, पटकथा तथा संवाद लेखेको भनिएको यो चलचित्रलाई दर्शकले रुचाएका छन् । सार्वजनिक भएको ३ सातामै यो चलचित्रले ८ लाख २० हजार भ्यूज बटुलिसकेको थियो । 

तर, चलचित्रको कथा ‘नामर्द’ नामक छोटो चलचित्रसँग मिलेपछि यसको निर्माण टिम विवादमा मुछिएको हो। ‘नामर्द’मा पूर्णिमा फुसे र अंकुर भिन्चुरकरले अभिनय गरेका छन् । सन् २०१९ को फ्रेवुअरीमा निर्माण भएको हिन्दी छोटो चलचित्र ‘नामर्द’लाई जयस मेस्ट्रीले लेखेका हुन् । उदय कामतको यो छोटो चलचित्रमा पटकथा, सम्पादन तथा निर्देशन छ ।

लिभिङ टुगेदरमा बस्ने जोडीको कथा भन्छ, मनबारले । केटी अचानक गर्भवती भएपछि, उ खुशी हुँदै बच्चा जन्माउन चाहन्छे । तर केटा झर्कंदै एबर्सन गर्ने कुरामा जोड दिन्छ । वास्तवमा केटीले केटाको नियत जाँच्नमात्र गर्भवतीको ढोंग रचेकी हुन्छिन् । त्यसपछि तिनले केटालाई छोड्दै स्वतन्त्र हुन्छिन् ।

मन बारको एक दृष्य

स्टाटसले निम्त्याएको बहसः

'मनबार'को कथा, प्रस्तुति र संवाद लगभग हुबहु उदय कामतको 'नामर्द'सँग मिल्छ । चोरीको विवाद आइसकेपछि अहिले जीवन शाहीको 'मनबार' युट्युबबाट हटाइसकिएको छ । तर, नायिका सुरक्षा पन्तको फेसबुक स्टाटसले नेपाली फिचर तथा छोटा फिल्ममा चोरीको प्रवृतिका सवालमा एउटा गतिलो बहस भने छेडेको छ । त्यसैले नै पन्तको स्टाटसको मुनि हामी केही सकरात्मक प्रतिक्रियाहरु देख्न सक्छौं । जस्तै, फिल्म समिक्षक अनुप सुवेदीले लेखेका छन्ः

नेपाली फिल्मकर्मीमा यतिको कमिटमेन्ट भए नेपाली फिल्म सुध्रन्छ भन्ने आस जागेर आउँछ । हाम्रो नेपालमा कपी, इन्स्पायर, आइडिया मिल्ने, प्रभावित आदि जस्ता कुराको बारेमा बहस भएको छैन । त्यस्ता कुराका बारेमा आम बुझाईमा सामन्जस्यता पनि छैन र के गर्न हुने क नहुने भन्ने पनि छैन । मिडियामा लेख्ने/बोल्नेले केही समानता देख्ने वित्तिकै चोरी, नक्कल भन्दिन्छन्, सबै त्यतै दौड्न्छन् । यस बिषयमा बहस तथ आम बुझाई र सहमति नबनी तपाईंलाई जस्तै समस्या आइरहनेछन् ।

त्यस्तै कलाकार केदार प्रसाद घिमिरेले प्रतिक्रिया दिएका छन्ः

तपाईको कुरो ठिक लाग्यो । त्यसैले सबैभन्दा पहिले (स्किृप्ट राइटर) लेखकको लागि राम्रो पैसा छुट्याउनु आवश्यक छ । नेपाली चलचित्र क्षेत्रमा लेखक ‘बाँच्न सक्छ’ .मात्र हैन ‘दामी कमाउँछ’ भन्ने कुरा सिद्ध गर्नुपर्छ ।

त्यस्तै अभिनेत्री उषा रजकले पन्तलाई भनेकी छन्, तिमीले ‘बोलेर राम्रो गर्यौ । तिमी सँधै जागरुक र सझक छौ ।’  अभिनेत्री बेनिसा हमालले पनि पन्तको जोडदार समर्थन गरेकी छिन्, ‘तिमी सँधै मेरो प्रिय छौ । तिमी राम्रो–नराम्रो छुट्याउछौ । तिमीप्रति गर्व छ ।’ 

सेक्सपियरको किङ्ग लियरको एडप्टेसन गर्दै अकिरा कुरोसावाले जापानिजमा र्यान बनाएका छन् । विसाल भारद्वाजले सेक्सपियरकै ओथेलो, म्यकवेथ र ह्यामलेटलाई लिएर हिन्दीमा ओमकारा, मकबुल र हैदर बनाएका छन् । यस्ता उदाहरण संसारभर हज्जारौं छन् । 

सिनेमामा इन्स्पायर हुने, आइडिया मिल्ने तथा प्रभावित हुने कुरा नौलो होइन । समिक्षक सुवेदीले भने झैं हामी कहाँ अझै यस विषयमा बहस नै भएको छैन । वास्तविक सर्जकलाई समुचित क्रेडिट दिँदै, अनुमती लिँदै सिनेमा बनाउने हो भने, निश्चयनै एक जिम्मेवार फिल्म मेकरले यस्ता चोरीको लफडामा फस्न पर्दैन । सम्भवत अबको बहस यतातिर पनि सोझिन पर्छ ।