‘डे’ इन हिस्ट्रीः दक्षिण कोरियामा पहिलो महिला राष्ट्रपति

इतिहास एकदिनमा निर्माण हुँदैन तर इतिहासका लागि हरेक दिन महत्वपूर्ण हुन्छन् । हरेक दिन दुनियाँका कुनाकप्चामा अनेकौँ घटना घट्दछन् । यी घटनाले हामीलाई जीवनमा थप परिष्कृत भएर अघि बढ्ने प्रेरणा दिन्छन् । १९ डिसेम्बरले पनि इतिहासमा यही अर्थ राख्छ । आजको दिन विश्वभर त्यस्ता अनेक महत्वपूर्ण घटनाहरू घटे । आउनुस्, इतिहासमा विश्वभर घटित त्यस्ता महत्वपूर्ण घटनाहरूमाथि दृष्टिगोचर गरौँः

दक्षिण कोरियामा पहिलो महिला राष्ट्रपति

सन् २०१२ मा दक्षिण कोरियामा पहिलो महिला राष्ट्रपति निर्वाचित भएकी थिइन् । आजकै दिन पार्क गिउन हाय देशको पहिलो महिला राष्ट्रपति र दक्षिणपूर्वी एसियाको सरकार प्रमुख बनेकी थिइन् । सन् २०१३ को फेब्रुवरीमा पार्कले कार्यभार सम्हालेकी थिइन् । सत्तामा हुँदा भ्रष्टाचार गरेको अभियोगमा विभिन्न मुद्दामा पूर्वराष्ट्रपति पार्क अहिले कारागारमा छन् ।

हङकङ चीन मातहत रहने सन्धीमा हस्ताक्षर

सन् १९८४ मा हङकङ सन्धीमा हस्ताक्षर भएको थियो । बेलायत सरकार, उत्तरी आयरल्यान्ड र जनगणतन्त्र चीन सरकारबीच एउटा संयुक्त घोषणापत्रमा हस्ताक्षर भएको थियो । चीन–व्रिटीश सन्धीसमेत भनिने सो सन्धीमा चीनको तर्फबाट झाओ जियाङ र बेलायतको तर्फबाट मार्गरेट थ्याचरले हस्ताक्षर गरेका थिए । सन्धीले सन् १९९७ को १ जुलाईदेखि हङकङ चीनको स्वामित्वमा रहने उल्लेख छ ।

एपोलो १७ को अन्तिम मिसन

सन् १९७२ मा एपोलो १७ पृथ्वीमा फर्किएको थियो । अमेरिकाको एपोलो कार्यक्रमअन्तर्गतको अन्तिम मिसन एपोलो १७ ले १२ दिनसम्म अन्तरिक्षमा बिताएको थियो । एपोलो १७ अमेरिकाबाट रातको समयमा पठाइएको पहिलो मानवसहितको उडान हो । एपोलोमा रहेका तीन सदस्यहरुले चन्द्रमाको कक्ष घुमेर त्यहाँ १२ दिन बिताएका थिए ।

क्लिनन्टनमाथि महाअभियोग

सन् १९९८ मा अमेरिकाका तत्कालिन राष्ट्रपति बिल क्लिन्टनमाथिको महाअभियोगलाई तल्लो सदन हाउस अफ रिप्रिजेन्टेटिभले अनुमोदन गरेको थियो । भुटो बोलेको र न्यायमा अबरोध गरेको भन्दै तल्लो सदननले क्लिन्टनमाथि महाअभियोग लगाएको थियो । एक महिनापछि आजकै दिन अर्थात १९ डिसेम्बरमा माथिल्लो सदन सिनेटले उनलाई सफाइ दिएपछि पदमुक्त हुनबाट बचेका थिए ।