राज आशातीतको कविताः ‘इतिहास साक्षी राखेर’

 इटहरीमा रहेर साहित्य सिर्जना गरिरहेका राज आशातीत प्रतिभावन कवि हुन् । 

चिसो चुल्हो,
बाउले मन पराइदेकी जहान
अनि
गोडा चारेक छिचिमिरा !
स्याउलाले बारेको महलमा
आकासको छानामुनी 
असरल्ल छाडेर....

झण्डै हजार सुर्यहरूको 
उदय अनि अस्त पश्चात 

नगरवधुको काखमा ब्यूँतिएर 
कम्ता लाग्यो र माया
आमाका लाम्टाहरूको !

चन्द्रमाहरूको लाखौँ लुकामारी छिचोलेर
कल्पिँदै नकल्पिएको 
दुर्गन्धित रछ्यानमाथि
बास आइरह्यो बाउको पसिना !

असारे झैँ
उर्लिएर.....
आफैँमाथि अनियन्त्रित 
मेरो इतिहास

भोलिको पुस्ता सम्झन्छु
दरपुस्ता सम्झन्छु
अनि तिनको जीवन सम्झन्छु !

अनि....
अर्कैले आर्जेको इतिहासमा 
आत्मरतीमा रमाइरहेको
म
इतिहास साक्षी राखेर भन्दैछु

कति पढ्नु त्यो पुरानो इतिहास ?