एकछिन् छुटौँ कि ?

पान्थर जिल्लाको याम्बोङमा जन्म भई सोही क्षेत्रलाई नै आफ्नो कर्मथलो बनाएका लेखक मलिसा याक्थुङ्बा  (महेन्द्रकुमार नेम्वाङ) लेखन सम्पादनका अलवा शिक्षण क्षेत्रमा संलग्न हुनुहुन्छ । लेखक याक्थुङ्बाका पछिल्ला कृति 'केयुक्ना नु आयुक्ना' (निबन्ध संग्रह २०७७), 'युप्पारुङ ' (कथा संग्रह २०७६), 'विद्वान रनध्वज नेम्वाङको जिवनी २०५६', 'खामाक पाङभेरेन् तुङहा' (नाटक २०५८), 'याक्थुङ पान्दाङरेन निरेङ' (२०५९) लगायत दर्जन भन्दा बढी पुस्तकहरू' प्रकाशन भई सकेका छन् । बहुआयामिक व्यक्तित्वका धनी याक्थुङ्बाले 'पकन्दी' , 'युगान्तर सन्देश', 'सुमहात्लुङ' लगायतका पुस्तकहरु सम्पादन गर्नको  साथै 'मसेमि', 'नुमाफुङ' लगायतका चलचित्रहरूमा अभिनय समेत गरेका छन् ।

शब्द बिडम्बना
सबैसँग मेल–बेमेल हुन्छ यहाँ
व्यस्त इच्छाहरूमाथि
छुट्नु अर्थको बेमेल
हुन्छ जस्तै 
उहिले नि
खोलाहरू जन्मँदा
थाङ्साङ रतुवा
मावा नाम्दुको एसएमएसले
माई र तमोरको
सुन्दर प्रेमील मिलन
हुन सकेनन् किम्बदन्तीमा
त्यस्तै
वर्तमान आख्यान
मेल–बेमेलको
मनोवैज्ञानिक अवयव रस्सातल
माइतमोर गेट टुगेदर
मिल्छन्, समुद्रमा
भेट्छन्, बगाईमा

मेल–बेमेलहरू
छुट्टिने अक्षर
सुन्दर धर्तीमाथि
जीवन
सगरमाथामा सिलौटी
आइफिलमा याग्राःङ्सिङ
ग्रेटवालमा क्यौरेनी
मुटुहरू जोडोस् 
मनहरू मिलोस्
भन्छु यहाँबाटै

छुट्टिँदाका वेस्वादहरू
बाँधिएर तद्रामा
मुक्कुमलुङ धागो झैं
नचुटिने माइतमोर प्रेम
बगाएर दुईकिनार
भेट सामुद्रिक
‘तिमी त पारी म पनि वारी ।
वारी र पारी मन्मनै सारी ।
बगेर जौँ न, सँगसँगै छेउ ।
मन्माया छ त, दिल्माया देऊ ।’
ख्याली सुसाईमा 

आखिर 
दर्दहरूको समय
जोडिन्न प्रकृतिमा
मन छुट्टिए पनि
वगेको मनहरू
मिलोस् उत्कर्षतामा
हुनु त
वर्ल्डट्रेड सेन्टर 
अनि टेथिस सागर पनि
विदा पाए मित्रवत्
तर
इतिहासले विदा दिएनन्
मनहरूले विदा गरेनन्
त्यसैले
म भन्छु
विदाइ बोलीले गरौँ एकछिन
सुन्दर अक्षरहरूले
इतिहास लेखोस् माईको
प्रेमील बगाईहरू
अमरत्व बनोस् तमोरको
विदा ।

शब्दार्थः तद्रा – सिलामसाक्माको अर्को नाम (वृजहाङपति जबेगुका आधार)