रातो मत्स्येन्द्रनाथको सांकेतिक रथयात्रा सम्पन्न

ललितपुरमा रातो मत्स्येन्द्रनाथको सांकेतिक रथयात्रा सम्पन्न भएको छ । कोरोना महामारीका कारण यो वर्ष पूरा रथयात्रा नगरी सांकेतिक रुपमा मात्रै रथयात्रा गरिएको हो । शनिबार करिब १५० जनाले स्वास्थ्य मापदण्ड पूरा गर्दै करिब २५ मिटर रथयात्रा गरेर त्यहीँ विसर्जन गरिएको हो ।

रातो मत्स्येन्द्रनाथको रथयात्रा करिब एक हजार ६०० वर्ष पुरानो मानिन्छ भने कुनै कारणबस जात्रा गर्न नसके यो यात्रा भक्तपुरले लैजाने प्रचलन छ । यस्तै प्रावधानका कारण पाटनले धेरै यात्राहरु गुमाइसकेको छ भने कोभिड १९का कारण रातो मत्स्येन्द्रनाथको रथयात्रा पनि धरापमा परेको थियो । 

रथयात्रा साढे २ बजे ललितपुरको पुल्चोकमा भएको हो । बुधबार बसेको सरोकारवालाको बैठकले कोरोना महामारीलाई मध्यनजर राख्दै न्यून संख्यामा उपस्थित भएर स्वास्थ्य सुरक्षाको मापदण्ड अपनाएर प्रतीकात्मक रुपमा रथ तान्ने निर्णय गरेको थियो ।

अघिल्लो वर्ष पनि कोरोना महामारीका कारण समयमा रथयात्रा हुन सकेको थिएन । ढिला गरी भएको रथयात्राको क्रममा स्थानीय प्रशासन र स्थानीयवासीबीच झडप समेत भएको थियो । तर यो वर्ष समयमा नै सरोकारवाला पक्षसँगको छलफलपछि रथयात्राको मिति तय भएकोले कुनै समस्या भए हुन पाएन । यद्यपि यो वर्ष झन् कोभिड १९ले विकराल रुप लिएको छ ।

यात्रालाई जसरीपनि यसलाई पाटनमै टिकाइरहन स्थानियवासीको चुनौति छ । त्यसैले आज सांकेतिक रथयात्रा सम्पन्न गरेरै भएपनि पाटनवासीले रातो मत्स्येन्द्रनाथको रथयात्राको प्रचलन भने बचाएका छन् । पाटनकै विशेष महत्वपुर्ण रातो मत्स्येन्द्रनाथको रथयात्राको लागि दुई सातादेखि रथ निर्माण थालिन्छ, विभिन्न प्रक्रिया र धार्मिक विधिसँगै क्षमापूजा गरिन्छ । रथारोहण सकिएपछि अक्षयतृतीयाका दिन मृतकहरूका आत्माले सजिलै वैतरणी नदी तरुन् भन्ने कामना गर्दैे रथको अगाडि गाई दान गरिने परम्परा रहेको छ ।

---