डरले पाँच दिनसम्म गोठमा लुकेको चन्द्रे कामीको भनाइ

मुगु- अन्तरजातीय विवाह गरेपछि बेपत्ता पारिएका भनिएका युवक चन्द्रे कामीले प्रहरीसँगको बयानमा आफू पाँच दिन जंगलका गोठहरूमा लुकेर बसेका बताएका छन् । 

उनले आफूलाई अपहरण नगरिएको तर डरले जंगलको गोठमा लुकेर बसेको बताएका छन् ।

चन्द्रबहादुर सामान्य अवस्थामा भेटिएको र अहिले पनि उनको अवस्था सामान्य रहेको प्रहरीले जनाएको छ ।

चन्द्रले सुन्तली मल्लसँग प्रेम विवाह गरेका थिए । सुन्तलीको परिवारले लगेर चन्द्रलाई निर्घात कुटपिट गरेर बेपत्ता पारेको आरोप लागिरहेका बेला उनी आज फेला परेका हुन् ।

चन्द्रबहादुरले मंसिर ५ गते मल्ललाई भगाएर लगेका थिए । त्यसको २४ दिनपछि एक समूह आएर युवतीलाई फिर्ता लगेको थियो । त्यसै दिनदेखि चन्द्रबहादुर पनि सम्पर्कविहीन भएका थिए ।  

जिल्ला प्रहरी कार्यालय हुम्लाले आफ्ना माताहतका प्रहरी चौकीलाई खोजी कार्य तीव्र पार्न निदेर्शन दिएको थियो । 

बाटोमा हिँड्दै गरेका क्रममा उनलाई खार्पु प्रहरी चौकीका सुरक्षाकर्मीले भेटाएका थिए ।