गाडी पठाएर मतदाता ओसार्दै दल र नेताहरू, काठमाडौं छाड्ने यात्रु ४० प्रतिशत बढे

काठमाडाैँ । स्थानीय निर्वाचन हुन दुई दिन मात्र बाँकी हुँदा काठमाडौं उपत्यका छाड्ने यात्रुहरूको चाप बढेको छ। देश भरिबाट विभिन्न सिलसिलामा काठमाडौं आएकाहरू मतदानकाे निम्ति आ-आफ्नो गाउँसहर फर्किने क्रम बढेसँगै उपत्यकाका बसपार्कमा चहलपहल बाक्लिन थालेको छ।

आइतबारबाट लामो दुरीका सवारी चाप अत्यधिक छ। ट्राफिक प्रहरीका अनुसार बिहान र साँझ काठमाडौंबाट बाहिरिने सवारी संख्या बढेको छ। निजी तथा सार्वजनिक सेवाका बस ‘रिजर्भ’ गरेर जाने पनि क्रम पनि उत्तिकै छ।

नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौला सामान्य अवस्थाको तुलनामा उपत्यका छाड्ने यात्रुको चाप ४० प्रतिशत बढेको बताए।

उनका अनुसार मतदाता ओसार्न राजनीतिक दल वा नेताहरूले व्यक्तिगत रूपमा गाडी रिर्जभ गरेर पनि पठाइरहेका छन्। व्यक्तिगत रूपमा टिकट काटेर घर जानेको संख्या पनि बढेको उनले बताए।

सरकारले निर्वाचनको दिन वैशाख ३० गते शुक्रबार सार्वजनिक यातायात बन्द गर्ने निर्णय गरेको छ। त्यस दिन आन्तरिक हवाई सेवा पनि बन्द हुने छ। यसले बिहीबारसम्म गाउँ पुग्ने गरी मानिसहरू धमाधम उपत्यकाबाट बाहिरिन थालेका हुन्।

निर्वाचनकै लागि भनेर झन्डै १२ लाख मानिस काठमाडौंबाट बहिरिने यातायात व्यवसायीहरूको अनुमान छ। उपत्यका छाड्ने यात्रुको चाप बढेपछि काठमाडौंका सडकमा मंगलबारबाट सवारी आवागमन पातलिन थालेको छ।

‘देशका ७७ जिल्लाकै मतदाता काठमाडौं उपत्यकामा छन्। उनीहरूलाई त गाउँ पुर्‍याउनै पर्‍यो। त्यसले पनि बुकिङ गर्ने क्रम बढेको छ। वैशाख २७, २८ र २९ गते गाडी बुकिङको चाप अत्यधिक छ।

यात्रु चाप बढे पनि बुकिङ शुल्क भने तोकिएको छैन। यात्रु लैजाने र व्यवसायीबीच छलफल हुन्छ र त्यसैअनुसार बुकिङ शुल्क तोकिने नेपालले बताए। सामान्यतया अरू बेलाभन्दा बुकिङ शुल्क दोब्बर पाइएको छ।

सरकारले चुनावका लागि सबै शैक्षिक संस्था लगायत सरकारी कार्यालय चार दिन विदा दिएको छ। यसले उपत्यका छाडेर आ-आफ्नो गाउँसहर जानेको संख्या बढ्ने अनुमान गरिएको छ। दलहरूले पनि मतदाता निम्ति बस रिजर्भ गरेर पठाएका छन्। कतिपय नेताले व्यक्तिगत रूपमा पनि आफ्ना निकटस्थ र शुभचिन्तकहरूका निम्ति बस पठाइदिएका छन्। चुनावको अघिल्लो दिनसम्म सर्वसाधारणलाई सित्तैमा घरगाउँ पुग्ने बन्दोबस्त दलहरूले गरिदिएका छन्।