महिला टी- २० अन्तर्राष्ट्रियमा नेपालको कीर्तिमानी जित,इन्दु बनिन् अर्धशतक प्रहार गर्ने पहिलो नेपाली खेलाडी

काठमाडौँ- महिला टी २० अन्तर्राष्ट्रियमा नेपालले हालसम्मकै ठूलो रन अन्तरको जित हात पारेको छ ।

नेपालले कतारमाथि १ सय १९ रनको कीर्तिमानी जित निकालेको हो ।

नेपालले दिएको १ सय ४७ रनको लक्ष्य पछ्याएको घरेलु टोली कतार ११.५ ओभर अलआउट हुँदै २७ रनमा समेटियो ।

कतारकी खादिजा इम्तियाज र एन्जेलिन मारेले सर्वाधिक ८/८ रन बनाइन्। यस्तै केरी पाउनसेटले ७ रन बनाउँदा रिज्फा बानो इमानुएलले ३ रन जोडिन् ।

कतारका ६ खेलाडीले खाता सम्म खोल्न सकेनन् । 

नेपालकी कप्तान रूविना क्षेत्री बेलबासेले १.५ ओभरमा १ रन खर्चेर ३ विकेट लिइन् । सीता रानामगरले २ ओभरमा १ मेडन सहित ३ रन खर्चेर २ विकेट लिइन् ।

कविता कुँवरले २ ओभरमा ६ रन खर्चेर २ विकेट लिइन् । करुणा भण्डारीको नाममा १ विकेट रह्यो ।

त्यसअघि कतारको दोहारस्थितवेस्ट इन्ड इन्टरनेशल क्रिकेट स्टेडियममा टस हारेर ब्याटिङको निम्तो पाएको नेपालले निर्धारित २० ओभरमा ४ विकेट गुमाउँदै १ सय ४६ रन बनाएको थियो ।

नेपालका लागि ४७ बलमा ५ चौकासहित सर्वाधिक ५५ रन बनाएकी इन्दु बर्माले रिटायर्ट हर्ट हुँदै अर्को खेलाडीलाई मौका दिएकी थिइन् ।

इन्दु नेपालका लागि टी २० अन्तर्राष्ट्रियमा अर्धशतक प्रहार गर्ने पहिलो खेलाडी बनेकी छिन् । 

यस्तै सीता राना मगरले आज ३३ बलमा ५ चौका सहित ३९ रन बनाएर आउट भइन् । सरिता मगर २१ बलमा २ चौका सहित २१ रनमा रन आउट हुँदा कविता कुँवर ८ रनमा अविजित रहिन् । 

कप्तान रुविना क्षेत्री बेलबासे शून्यमा रन आउट हुँदा ओपनर काजल श्रेष्ठ ३ रन बनाएर आउट भइन् ।

नेपालले कतारसँग बुधबार दोस्रो र बिहिबार तेस्रो खेल खेल्नेछ । 

आइसिसी वुमन्स टी २० एसिया छनोटअघि तयारीको लागि नेपालले कतारसँग तीन टि २० अन्तर्राष्ट्रिय सिरिज खेलेको हो ।