टी २० विश्वकपमा डिफेन्डिङ च्याम्पियन वेस्टइन्डिजको पहिलो जीत

काठमाडौँ- टी २० विश्वकपमा वेस्टइन्डिजले पहिलो जीत निकालेको छ ।

दुई खेलमा लगातार पराजय बेहोरेको डिफेन्डिङ च्याम्पियन वेस्टइन्डिजले शुक्रबार समूह ए को भिडन्तमा बंगलादेशलाई ३ रनले पराजित गरेको हो । 

शारजाहमा भएको खेलमा टस हारेर पहिला ब्याटिङ गरेको वेस्टइन्डिजले ७ विकेट गुमाएर १४२ रन बनाएको थियो । जवाफमा बंगलादेशले ५ विकेट गुमाएर १३९ रनमा रोकियो ।

तीन खेलमा पराजित भएको बंगलादेशको सेमिफाइनल पुग्ने सम्भावना भने लगभग समाप्त भएको छ । 

वेस्टइन्डिजका लागि क्रिस गेलले ४ रन बनाउँदा इभन लुईसले ६ रनको योगदान गरे । रोस्टन चेसले सर्वाधिक ३९ रन बनाउँदा कप्तान किरोन पोलार्डले १४ रनमा नटआउट रहे ।

निकालेल पुरनले ४० रनको योगदान गर्दा जेसन होल्डरले १५ रनको पारि खेले ।

बंगलादेशका मेहदी हसन, मुस्तफिजुर रहमान र सोरफुल इस्लामले समान २–२ विकेट लिए ।

१४३ रनको जवाफी लक्ष्य पछ्याएको बंगलादेशका लागि लिटन दासले सर्वाधिक ४४ रन बनाउँदा मोहमदुल्लाहले ३१ रनको नटआउट पारि खेले पनि हार टार्न भने सकेनन् ।

यसैगरी मोहम्द नइम र सौम्य सरकारले १७–१७ रन जोडे । रभि रामपौल, जोसन होल्डर, आन्ड्रे रसेल, अकिल हुसेन र डुवान ब्राभोले समान एक एक विकेट लिए ।