टी–२० विश्वकप : मुजिब र राशिदको घातक बलिङले टिक्न दिएन स्कटल्याण्डलाई

काठमाडौं- अफगानिस्तानले टी–२० विश्वकपको सुपर–१२ अन्तर्गत पहिलो खेलमा स्कटल्यान्डलाई हराएको छ ।

सोमबार शारजाहमा भएको खेलमा स्पीनरद्वय मुजिब उर रहमान र राशिद खानको उत्कृष्ट प्रदर्शनमा अफगानिस्तानले १ सय ३० रनको सानदार जित दर्ता गर्दै स्कटल्याण्डलाई पराजित गरेको हो। 

जितका लागि १ सय ९१ रनको लक्ष्य पछ्याएको स्कटल्यान्ड १० ओभर २ बलमा ६० रनमै अलआउट भयो ।ओपनर जर्ज मुन्सेले २५ रन जोड्नुबाहेक अन्य ब्याट्सम्यान खासै चल्न सकेनन् ।  मुजिबले ५ र राशिदले ४ विकेट लिए ।

त्यसअघि टस जितेर ब्याटिङ रोजेको अफगानिस्तानले २० ओभरमा ४ विकेट गुमाउँदै १ सय ९० रन बनाएको थियो । अफगानिस्तानका  नाजिबुल्लाह जद्रानले सर्वाधिक ५९ रन जोडे ।

स्कटल्यान्डका लागि सफ्यान सरिफले २ तथा जोश डेभि र मार्क वाटले १–१ विकेट लिए । 

आज पहिलो खेलमा पौने चार बजे दक्षिण अफ्रिकाले वेस्ट इन्डिजको सामना गर्नेछ । राति पौने ८ बजे हुने खेलमा न्युजिल्यान्ड र पाकिस्तान भिड्नेछन् ।