आजको फोटो : जरुर फेरि नयाँ दिनको सुरुवात हुनेछ

संसार कोभिड महामारीको दोस्रो लहरको मारमा छ । अझ दक्षिण एसिया त्यसमा पनि भारत र नेपालको अवस्था नियन्त्रण बाहिर पुगेको छ । कुनै पनि अस्पतालहरू खाली छैनन् । कोभिडका बिरामीहरूलाई पहिलो पटक काठमाडौंबाट मोफसलका साना सहरहरुतिर उपचारका निम्ति हस्पिटलहरू खोज्दै लगिँदैछ । यस्तो महामारीको समयमा पनि नेपालका राजनैतिक दलहरू स्वार्थको घृणित खेलमा लागेका छन् । सबै मिलेर आम नागरिकको रक्षार्थ महामारीसँगको लडाईँमा एकसाथ उभिनु पथ्र्यो तर उभिएनन् । यो महामारीको पछाडि राजनैतिक सत्तासँगै तपाईँ हामी आम नागरिकको पनि कमजोरी छ । हामी पनि, आफ्नो स्वार्थका निम्ति सत्ताको गुलामी हुन पुग्यौं । हनुमानगिरी गर्दा गर्दै खराबहरुलाई पनि हामीले इश्वर बनायौं । फरक बिचार आस्था राख्नेहरूलाई हामीले सही नै छन् , भने पनि बैरी सम्झ्यौं । सहीलाई सही र गलतलाई गलत भन्न नसक्नुको परिणाम हो आजको नेपाल । जहाँ प्रत्येक दिन लासहरूको विस्कुन लाग्न थालेको छ ।

यद्दपी,समस्यमासँगै सम्भावना पनि जिवित हुन्छ । कोभिडसँग हेलचेक्र्याईँ नगरौँ । जहाँ छौ सुरक्षित बसौँ । आवश्यक नियमहरु पालना गरौँ । मनोवल उच्च राखौँ। आखिर मर्नेभन्दा निको हुने बढी नै छन्, यो सत्य मनन् गर्दै उर्जा कायम राखौँ । पक्कै अँध्यारो हटेर विहानी आउँछ । हिम्मत नहारौँ । द मार्जिनले आजबाट ‘आजको फोटो’ स्तम्भको सुरुवात गरेका छौँ । यो तस्बीर पुर्वी ताप्लेजुङ जिल्लामा अवस्थित मुक्कुमलुङ (पाथिभरा) धाम जाँदा प्रकाश आङदेम्बेले खिचेका हुन् । पुर्वी आकासबाट विहानीको पहिलो झुल्के घामको सामान्य फोटोे हो । जीवनमा हामी आसावादी हुनुपर्छ । हरेक अँँध्यारोहरूमा सम्भावनाको नयाँ घाम झुल्किन्छ भन्ने सन्देश दिनका निम्ती यहाँ राखेका छौँ । यहाँहरू सबैको जिन्दगीमा नयाँ घाम झुल्कियोस् । जरुर फेरि नयाँ दिनको सुरुवात हुने नै छ।. शुभकामना ।