मन्त्रीलाई गगन थापाले भने, एकपटक इम्बोस्ड नम्बर प्लेटको लाइनमा बसेर हेर्नुस्

काठमाडौँ । नेपाली कांग्रेसका महामन्त्री तथा सांसद गगनकुमार थापाले भौतिक पूर्वाधार तथा यातायातमन्त्री रेणु यादवलाई इम्बोस्ड नम्बर प्लेट राख्नका लागि यातायात कार्यालयको लाइनमा बस्न सुझाव दिएका छन् ।

शहरी विकास मन्त्रालयको बजेटमाथि संसदमा भएको छलफलमा भाग लिँदै सांसद थापाले यस्तो सुझाव दिएका हुन् । उनले असारभित्र इम्बोस्ड नम्बर राखिसक्नुपर्ने कुरा असम्भव भएको भन्दै उक्त निर्णय फिर्ता लिन आग्रह गरे ।

उनले भने, ‘काठमाडौँमा यातायात कार्यालयहरुमा जे खालको अवस्था छ, एकपटक मन्त्री नभई साधारण नागरिक भएर आफ्नो गाडी लिएर इम्बोस्ड नम्बर प्लेट बदल्नका लागि लाइनमा बस्नुभयो भने नागरिकले कति सास्ती पाइरहेको छ भन्ने अनुभूति हुन्छ ।’,

उनले नागरिकलाई दुःख दिन नपाइने बताउँदै भने, ‘यति धेरै नागरिकलाई दुख दिन मिल्दैन, पाइँदैन । यातायात कार्यालयले सक्दैन, असारभित्र असम्भव छ ।’