काठमाडौंमा जोर बिजोर प्रणाली हट्यो

काठमाडौं - कोरोना संक्रमण नियन्त्रणका लागि भन्दै काठमाडौं उपत्यकामा सञ्चालन हुने सवारीका साधनमा लागू गरिएको जोर बिजोर प्रणाली हटाइएको छ ।

काठमाडौं उपत्यकाका तीनवटै जिल्लाका प्रमुख जिल्ला अधिकारीको बैठकले सवारीका साधनमा लगाइएको जोर बिजोर प्रणाली हटाउने निर्णय मध्यरातिबाट लागू भएको हो ।

७ माघ मध्यरातिदेखि जोर बिजोर लागू भएको थियो । त्यसपछि १४ माघमा संशोधन गर्दै सार्वजनिक सवारीका साधनमा जोर बिजोर हटाइएको थियो । तर, निजी सवारीसाधनमा भने जोर बिजोर कायमै थियो ।

काठमाडौंका प्रमुख जिल्ला अधिकारी गोविन्द रिजालले कोरोना महामारीमा जारी स्वास्थ्य मापदण्डको पालना गर्नेगरी जोर बिजोर प्रणाली हटाइएको जानकारी दिए । 

उनका अनुसार गाडीमा सिट क्षमताभन्दा बढी यात्रु राख्न पाइने छैन भने मास्क अनिवार्य गरिएको छ ।