दुई लाख घुस लिने काठमाडौं महानगरका वडा सदस्यविरुद्ध मुद्दा दायर

काठमाडौं - काठमाडौं महानगरपालिकाका एक वडा सदस्यविरुद्ध मुद्दा दायर गरिएको छ । सेवाग्राहीबाट दुई लाख घुस लिएको पाइएपछि वडा नम्बर १४ का वडासदस्यले वसन्त महर्जनविरुद्ध विशेष अदालतमा मुद्दा दायर भएको छ । 

महर्जनविरुद्ध भ्रष्टाचार निवारण ऐन बमोजिम जरिबाना र कैद सजाय हुन मागदाबी गरी विशेष अदालतमा आरोपपत्र दायर गरिएको हो ।

अख्तियारका सहायक प्रवक्ता वेदप्रसाद भण्डारीका अनुसार अख्तियार दुरुपयोग अनुसन्धान आयोगले सो रकम घुस लिएको अवस्थामा महर्जनलाई पक्राउ गरी अनुसन्धान गरिरहेको थियो ।

अनुसन्धानबाट पुष्टि भएपछि मुद्दा दायर गरिएको अख्तियारले जनाएको छ । जग्गाको मोहियानी हक नामसारी र नाता प्रमाणित गरी मोही प्रमाणपत्र र मालपोत तथा भूमि व्यवस्था कार्यालय काठमाडौंलाई सिफारिस दिनका लागि महर्जनले दुईलाख घुस लिएको अख्तियारले जनाएको छ ।