देशभर वर्षा र हिमपात, आइतबारदेखि मौसम सुध्रने

काठमाडौं - बिहिबार बेलुकादेखि परिरहेको वर्षाका कारण देशका विभिन्न ठाउँमा हिमपात भइरहेको छ । विभिन्न क्षेत्रमा भारी हिमपात र वर्षा हुँदा जनजीवन कष्टकर बनेको छ । अरु दिनको तुलनामा आज तापक्रम घटेको छ ।

विहीबार रातिदेखि सुदूरश्चिम प्रदेश, कर्णाली प्रदेश र वाग्मती प्रदेशमा भारी हिमपात र वर्षा भएको छ । हिमपातका कारण त्रिभुवन राजपथ अवरुद्ध भएको छ । 

विभिन्न क्षेत्रमा मेघ गर्जनसहित चट्याङ परेको छ । महाशाखाका अनुसार लुम्बिनी प्रदेश, मधेस प्रदेशलगायतका क्षेत्रमा पानी पर्नुका साथै हावाहुरी चलिरहेको छ ।

महाशाखाका वरिष्ठ मौसमविद् वरुण पौडेलले पश्चिमी न्यूनचापीय प्रणालीका कारण काठमाडौं उपत्यकाका डाँडाकाँडा, चितवन, जुम्ला, रुकुमपश्चिमलगायत क्षेत्रहरुमा भारी हिमपात भएको जानकारी दिए ।

‘‘आइतबारपछि क्रमिक रुपमा मौसममा सुधार आउँदै जाने देखिएको छ । गएरातिदेखि भएको वर्षाले तापक्रम केही घटेको छ । शनिवार र आइतबार केही तापक्रम घट्ने अनुमान छ । त्यसपछि मौसममा सुधार आएपछि केही तापक्रम वृद्धि हुँदै जानेछ,” उनले भने ।आइतबारदेखि पूर्वी नेपाल हुँदै पश्चिमी न्यून चापीय प्रणाली निष्कृय हुँदै  जाने र मौसममा सुधार आउने महाशाखाले जनाएको छ ।