नेपाल र भारतका दमकलले ५ घण्टा लगाएर आगो निभाए

झापा - झापाको काँकरभिट्टास्थित एसएस फुटवेयरमा लागेको आगो नियन्त्रणमा आएको छ । बिहीबार झण्डै १२ बजेबाट सुरु भएको आगलागी ५ घण्टापछि नियन्त्रणमा आएको हो ।

मेचिनगरका व्यवसायी श्याम पिन्टुको जुत्ता उद्योगमा विद्युत् सर्ट भई आगलागी सुरु भएको बताइएको । आगलागीबाट ८ करोडको क्षति भएको प्रहरीको प्रारम्भिक अनुमान छ ।

आगलागी नियन्त्रणका लागि नेपालका १० वटा र भारतका ३ वटा दमकल काँकरभिट्टा पुगेका थिए । काँकरभिट्टा प्रहरी प्रमुख सुनिलकुमार सिंहका अनुसार भारतका दमकल फर्किसकेका छन् भने नेपालका फर्किने क्रममा छन् । आगो नियन्त्रणमा लिन नेपाली सेना, जनपथ, सशस्त्र प्रहरी तथा स्थानीय खटेका थिए ।