फाल्गुन नजिकिदै गर्दा काठमाडौं किन चिस्सियो ?

काठमाडौं - फाल्गुन नजिकिए पनि काठमाडौं पछिल्लो दिनहरूमा थप चिसो हुँदै गएको छ ।  यो वर्षको जाडोयाम सकिएको अपेक्षा गरिरहेका बेला पुनः जाडो बढ्ने त होइन भन्ने शंका राजधानीबासीमा बदलिएको मौसमले पैदा गरिदिएको अवस्था छ । काठमाडौंको तापक्रम शून्यमा झर्न सक्ने अनुमान  समेत गरिएको छ।

माघको तेस्रो सातामा प्रवेश गर्न लागिसकेकाले अब जाडो क्रमशः घट्दै जाने अपेक्षा विपरित मौसम थप चिसो हुँदै गएको छ ।मौसमी प्रणाली थप सक्रिय हुँदा त्यसले चिसो अझै धेरै बढाउनेछ । परिणामः अहिलेकोभन्दा जाडो महसूस हुनेछ । मंगलबार बिहान ६ बजे काठमाडौंको तापक्रम ४.६ डिग्री सेल्सियस रहेको छ । 

मौसमविद्हरु भने जाडो पुनः एकपटक बढ्ने भन्दै चिसोबाट बच्न सावधानी अपनाउन सुझाव दिइरहेका छन् । “अर्को एउटा प्रणाली आउँदा अहिलेको भन्दा चिसो हुने देखिन्छ । आज बिहान काठमाडौंको तापक्रम ४.६ डिग्री सेल्सियस रहेको छ । अर्को मौसमी प्रणाली विकास हुँदा योभन्दा कम तापक्रम हुनेछ,” मौसमविद् मञ्जु बासीले बताइन् । 

पश्चिमी न्यून चापीय प्रणाली थप सक्रिय हुँदा तापक्रम घट्ने भएको हो । यद्यपि, शून्य डिग्री नै पुर्‍याउँछ भन्ने यकिन नरहेको उनी बताउँछिन् । दुई तीन दिनमा शून्य डिग्रीमा पुर्‍याउने सम्भावना कम हुने तर यो प्रणाली लामो समय बलियो भएर सक्रिय रहेको खण्डमा भने यो सम्भावना पनि रहन्छ ।