गिरिजाप्रसाद कोइराला कलेजमा हल्ट प्राइज प्रतियोगिता हुँदै

मोरङ - सन् २०१६ देखि सञ्चालन हुन थालेको हल्ट प्राइज अर्थात् अन्तर्राष्ट्रिय सामाजिक उद्यमशीलता चुनौतीलाई नेपालका विभिन्न क्याम्पसहरूले सञ्चालन गर्दै आएका छन् । त्यसैलाई निरन्तरता दिँदै पूर्वको मोरङमा अवस्थित पूर्वाञ्चल विश्वविद्यालय (PU) को आङ्गिक क्याम्पस गिरिजाप्रसाद कोइराला कलेज अफ एग्रीकल्चर एन्ड रिसर्च सेन्टर (GPCAR) मा पोहोर साल जस्तै यसपालि पनि प्रतियोगिता सञ्चालन हुने भएको छ ।

कोरोना महामारीले गर्दा अहिले संसारभरि धेरै मानिसहरू बेरोजगार भएर बस्न बाध्य भएका छन् । यसैलाई लक्षित गर्दै यसपालिको हल्ट चुनौती 'Getting The World Back Into The Work' मा आधारित रहेर आफ्नो उद्यम उपायहरूले सन् २०२४ सम्म अर्थात् अबको दुई वर्ष भित्र २००० मान्छेलाई रोजगार दिन सक्नु पर्ने हुन्छ ।

यसैगरि, संयुक्त राष्ट्रमा रहेको १७ बुँदे दिगो विकासका कार्यक्रम मध्य अहिले विद्यार्थीहरूले बुँदा नं ८ मा रहेको 'Decent Work And Economic Growth' लाई आत्मसात् गर्दै यस वर्षको हल्ट प्रतियोगितामा उद्यमी उपायहरू निर्माण गर्न सक्नुपर्ने हुन्छ ।

उत्कृष्ट हुने उद्यमी उपायलाई हल्टले १ मिलियन अमेरिकी डलर प्रदान गरेर आफ्नो उद्यमलाई दिगो रूप दिने मार्ग तय गर्ने बाटो खुलाउने छ ।

क्याम्पस गिरिजाप्रसाद कोइराला कलेज अफ एग्रीकल्चर एन्ड रिसर्च सेन्टर (GPCAR)मा गत वर्ष क्याम्पस निर्देशकमा चयन भएर हल्टलाई सफल पार्न शम्भु कट्टेलले भूमिका खेलेका थिए भने यस वर्षको चुनौतीलाई रिजन दाहालले निर्देशकको भूमिका निभाउँदै प्रतियोगितालाई उत्कृष्ट बनाउन लागि परेका छन् ।