सञ्जय तुम्बाहाङ्फेको कवितासङ्ग्रह ‘सृष्टिको याङ्दाङ्’को विमोचन

काठमाडौं- कवि सञ्जय तुम्बाहाङ्फेको कवितासङ्ग्रह ‘सृष्टिको याङ्दाङ्’ सार्वजनिक भएकाे छ । याक्थुङ लेखक संघ, उपत्यका समितिको आयोजनामा मंगलबार ललितपुरस्थित चुम्लुङहिममा किताबको लोकार्पण भएको हो ।

कार्यक्रमका प्रमुख अतिथि कवि बिमला तुम्खेवाले सञ्जय तुम्बाहाङ्फेका कविताहरुमा मुन्धुमी बिम्बहरुको प्रयोगसँगै प्रतिरोधी चेत पाइने बताइन् । यो कवितासङ्ग्रहले साहित्यवृत्तमा कविको नाम स्थापित हुने कुरामा आफू विश्वस्त रहेको उनले बताइन् ।

वक्ता कवि स्वप्निल स्मृतिले सञ्जय तुम्बाहाङ्फेका कविताहरुलाई विद्रोही कविताको संज्ञा दिए । वैरागी काइँलाबाट सुरु भएको मुन्धुमी बिम्बहरुको सफल प्रयोगलाई सञ्जयले पनि निरन्तरता दिएको उनले बताए । सञ्जयका कविताहरु सामाजिक न्यायको पक्षमा र सबै खाले विभेदका विरुद्ध लेखिएको उनको भनाइ थियो ।

अर्का वक्ता कवि केशव सिलवालले सञ्जयका कविताहरु गैरजनजातिले धेर पढ्नुपर्नेमा जोड दिए । लिम्बू समुदायको मनोविज्ञान, सौन्दर्यशास्त्र र सांस्कृतिक परिवेशलाई नजिकबाट बुझ्नका लागि कवितासङ्ग्रहले भूमिका खेल्ने उनले बताए ।

सञ्जयका कविताहरुले विभेदमुक्त सांस्कृतिक समाजको परिकल्पना गरेको उनको भनाइ थियो । कवितासङ्ग्रह ‘सृष्टिको याङ्दाङ्’लाई निम्बल पब्लिकेसनले बजारमा ल्याएको हो ।