मधेस आन्दोलनको १५ वर्ष, आज पनि सार्वजनिक बिदा

काठमाडौं-  मधेस बलिदानी दिवसको अवसरमा मधेस प्रदेश सरकारले आज (बुधबार) पनि सार्वजनिक बिदा दिएको छ ।

प्रदेशको नाम 'मधेस प्रदेश' र राजधानी जनकपुरधाम कायम गरेको खुसीयालीमा मंगलबार बिदा दिएको प्रदेश सरकारले बुधबार पनि मधेस बलिदानी दिवसको अवसरमा सार्वजनिक बिदा दिएको प्रदेश सरकारका आन्तरिक मामिला तथा सञ्चारमन्त्री भरतप्रसाद साहले जानकारी दिए । 

पहिलो मधेस आन्दोलनको आज १५ वर्ष पूरा भएको छ,  जुन आन्दोलन १९ दिनसम्म चलेको थियो । मधेसमा अधिकार प्राप्तिका लागि पटक-पटक गरि तीनपटक भएको आन्दोलनमा जम्मा १ सय ३ जनाले शहादत प्राप्त गरेका थिए । 

मधेस आन्दोलनको सम्झनालाई ताजा राख्नका लागि प्रत्येक वर्ष यो दिनलाई बलिदानी दिवसको रुपमा मनाइदै आएको छ ।मधेस आन्दोलनका क्रममा सिराहाको लहानमा रमेश महतोको मृत्यु भएको दिनलाई मधेस बलिदानी दिवसका रूपमा मनाउने गरिएकाे छ ।

 ०६३ साल माघ ४ गते  सप्तरीको कञ्चनपुर बेरियर (हाल कञ्चनरुप नगरपालिका ५) मा लगभग तीन घण्टा चक्काजामसँगै सुरु भएको यस आन्दोलनले भोलिपल्टै सिरहाको लहान तनावग्रस्त बनायो । लहानमा चक्काजाम गरी बसेका युवामाथि प्रहरीले अत्यधिक बल प्रयोग गर्‍यो । यसको जवाफमा चक्काजामका कारण रोकिएका दर्जनौं सवारी साधन खरानी बने । यही तनावका बीच गोली चल्यो र गोलीको शिकार बने सिरहा मझौराका रमेश महतो । उनी तत्कालै ढले । महतो ढलेलगत्तै उनको लास लुकाउने प्रयास भयो । तत्कालीन नेकपा माओवादीका नेता मातृका यादव यसमा मुछिए ।

यो घटनाले उग्र रुप लियो र तराई/मधेसका सबै जिल्लामा आन्दोलन फैलियो । राजमार्गको दुबै छेउमा रहेका मोटामोटा रुखहरु ढालेर सडक अवरुद्व गरियो ।